திரிசங்கு சொர்க்கத்தில் விபி கிராம் ஜி வேலை வாய்ப்புத் திட்டம்!?

(ஆகஸ்ட் 19 அன்று ஊரக வளர்ச்சி மானிய கோரிக்கை மீது பேசிய முன்னாள் அமைச்சர் ஐ.பெரியசாமி, “எங்களது ஆட்சியில் மகாத்மா காந்தி ஊரக வேலைவாய்ப்புத் திட்டத்தில் ரூ 13,000 கோடி ஒதுக்கப்பட்டிருந்தது. ஆனால் 50 நாட்கள் மட்டுமே வேலை வழங்க முடிந்தது. இப்போது 12643 கோடி (ஒன்றிய ஆட்சி 7,586+ மாநில அரசு ரூ 5057 கோடி) மட்டுமே ஒதுக்கப்பட்டுள்ளது. இதைக் கொண்டு எப்படி 125 நாள் வேலை வழங்குவீர்கள்? நீங்கள் கூடுதலாக 25 நாட்கள் தருவோம் என்று சொல்கிறீர்கள். எப்படி கொடுக்க முடியும்” என்று கேட்டார்.

அதற்கு பதிலளித்த அமைச்சர் புஸ்ஸி ஆனந்த், “125 நாள் வேலை செய்த அனைவருக்கும் மேலும் 25 நாள் தர முதலமைச்சர் முடிவெடுத்து நிதி ஒதுக்கப்பட்டுள்ளது” என்று சொன்னார். இதுவரை 50 நாள் வேலை மட்டுமே தரப்பட்டது என்றால், மோடியின் 125 நாள் எப்படி? விஜயின் கூடுதலாக 25 நாள் எப்படி? வாசகர்கள் பின்வரும் செய்திக் கட்டுரையை படித்துப் பார்த்து முடிவுக்கு வரவேண்டும். மட்டுமின்றி ஊரக வளர்ச்சித்துறை அமைச்சர் ஆனந்தும் எதிர்கட்சி வரிசையில் உள்ள திமுக மேனாள் அமைச்சரும் படிப்பது நல்லது)

மகாத்மா காந்தி தேசிய ஊரக வேலை உறுதிச் சட்டத்தில் ஒன்றிய அரசு, முறையற்ற தலையீடுகளை மேற்கொண்டது, இதனால், கிராமப்புரத் தொழிலாளர்கள் பெரும் விலை கொடுத்து வருகின்றனர். மகாதேஊவே வன் கீழும், மாற்றாகக் கொண்டுவரப்பட்ட ‘விக்சித் பாரத் - வேலைவாய்ப்பு மற்றும் வாழ்வாதார உத்தரவாத இயக்கம் (கிராமின்)’ [விபி கிராம் ஜி] திட்டத்தின் கீழும் வேலைவாய்ப்பு உருவாக்கம் இதுவரை இல்லாதவாறு கடும் சரிவைச் சந்தித்துள்ளது.

புள்ளிவிவரங்கள்படி, கடந்த ஆண்டு ஜூலை மாத மகாதேஊவேஉ திட்ட வேலைவாய்ப்புடன் ஒப்பிடும்போது, 2026 ஜூலையில் விபி கிராம் ஜி திட்டத்தில் வேலைவாய்ப்பு 50% சரிந்துள்ளது.

2026 ஜூலைக்கான 7.7 கோடி மனித-நாள்கள் என்ற ஆரம்பக்கட்ட உத்தேசக் கணக்கின் அடிப்படையில் இந்த 50% சரிவு கணக்கிடப்பட்டது. சமீபத்திய தரவுகளின்படி இது 8.3 கோடியாக உள்ளது; ஊரக வளர்ச்சி அமைச்சகத்தின்படி இறுதி எண்ணிக்கை சுமார் 9 கோடியாக இருக்கலாம். ஜூலை மாதத்திற்கான இந்த உத்தேச அளவை நாம் ஏற்றுக்கொண்டாலும் கூட, ஜூலை 2025-ஐ விட இது 40%-க்கும் அதிகமான பெரும் பின்னடைவாகும்.

திசைதிருப்பும் சாக்குப்போக்கு

2026 ஜூலை மாதத்தில், ஒருசில மாநிலங்கள் விபி கிராம் ஜி சட்டத்தின் 6-வது பிரிவின் கீழ் திட்டத்தை  அமலாக்கம் செய்யாமல் நிறுத்தி வைத்திருந்ததே இந்த பின்னடைவுக்குக் காரணம் என ஊரக வளர்ச்சி அமைச்சகம்  பலவீனமான ஒரு வாதத்தை முன்வைக்கிறது. இது அப்பட்டமான திசைதிருப்பல். முதலாவதாக, மொத்த வேலைவாய்ப்பில் இந்த மாநிலங்களின் பங்கு மிகக் குறைவு; மேலும், இந்த மாநிலங்களைத் தவிர்த்துவிட்டுப் பார்த்தாலும் சரிவின் விகிதம் அதே அளவில்தான் உள்ளது. இரண்டாவதாக, இந்த ஜூலை மாதச் சரிவு என்பது முன்னரே தொடங்கிவிட்ட ஒரு நெருக்கடியின் தொடர்ச்சியே தவிரப் புதியது அல்ல.

சில பின்னணி விவரங்கள் இதைத் தெளிவாகப் புரியவைக்கும்: மகாஊவேஉதி திட்டத்திற்கு மாற்றாக விபி கிராம் ஜி  கொண்டுவருவதற்கான மசோதா 2025-டிசம்பரில் நாடாளுமன்றத்தில் அவசர அவசரமாக நிறைவேற்றப்பட்டது. 2026 ஏப்ரல் 1 முதல் இந்த மாற்றம் நடைமுறைக்கு வரும் என ஊரக வளர்ச்சி அமைச்சர் அறிவித்தார். ஆனால் ஏப்ரல் 1 அன்று நடைமுறைக்கு வரவில்லை. திட்டத்திற்கான விதிகள் கூட இன்னும் வகுக்கப்படவில்லை. இதனால் மகாஊவேஉதி தொடர்ந்து நீடித்தது.

மே 22, 2026 அன்று, அமைச்சகம் விபி கிராம் ஜி திட்டத்திற்கான வரைவு விதிகளைப் பொதுமக்களின் கருத்துக்காக வெளியிட்டது. இந்த விதிகள் பெருமளவில் மகாதேஊவேஉதிட்ட விதிகளின் மறுவடிவமே ஆகும். இறுதி விதிகள் ஜூன் மாத இறுதியில் வெளியாகின; சரியாக ஜூலை 1 அன்று மகாஊவேஉதிட்டத்தை விபி கிராம் ஜி ஆக அதிகாரப்பூர்வமாக மாற்றுவதற்குச் சற்று முன்னதாக இந்த விதிகள் வெளியிடப்பட்டன. ஜூன் 30 அன்று நாள் ஒன்றுக்கு குறைந்தபட்சம் ₹300 என்ற அளவில் விபி கிராம் ஜி ஊதிய விகிதங்களும் அறிவிக்கப்பட்டன—இது 2009-10 விலைகளின்படி முந்தைய மகாஊவேஉதி-ன் ₹100 என்ற அளவுக்கு இணையானது.

மாறுதல் காலமும் கள யதார்த்தமும்

இந்த நிதியாண்டின் முதல் மூன்று மாதங்களில் (ஏப்ரல் முதல் ஜூன் வரை) குழப்பமே நீடித்தது. கிராம்சியின் கூற்றை மேற்கோள் காட்டுவதானால், 'பழைய மகாதேஊவேதி உலகம் மறைந்து கொண்டிருந்தது; புதிய விபி கிராம் ஜி உலகம் பிறக்கப் இன்னும்போராடிக் கொண்டிருந்தது.' சில மாவட்டங்களில், மகாதேவேஉ திட்ட அதிகாரிகள் புதிய பணிகளைத் தொடங்க மறுத்துவிட்டனர். பல பகுதிகளில் மகாதேவேஉ வேலைகளே அறவே நடக்கவில்லை. கோடைக் காலங்களில் (விவசாயப் பணிகள் மந்தமாக இருக்கும் போது) மகாதேவேஉதி பொதுவாக உச்சத்தில் இருக்கும் என்பதால், இது ஒரு தீவிரமான பின்னடைவாகும். ஜூலை 2026-ல் விபி கிராம் ஜி தட்டுத்தடுமாறித் தொடங்கியது. இந்த நிச்சயமற்ற நிலை தொடர்கிறது.

2024-25 மற்றும் 2025-26 நிதியாண்டுகளின் முதல் நான்கு மாதங்களில் (ஏப்ரல் முதல் ஜூலை வரை) முறையே 128 கோடி, 119 கோடி மனித-நாள்கள் வேலைவாய்ப்பு உருவாக்கப்பட்டு, ஆண்டின் மொத்த வேலைவாய்ப்பில் கிட்டத்தட்ட 50% பூர்த்தி செய்யப்பட்டது. ஆனால் 2026-27-ல், MGNREGA மற்றும் VB-G RAM G இரண்டும் சேர்ந்து அதே மாதங்களில் வெறும் 70 கோடி மனித-நாள்கள் வேலைவாய்ப்பை மட்டுமே உருவாக்கியுள்ளன—இது முந்தைய இரண்டு ஆண்டுகளின் சராசரியை விட 43% சரிவாகும்.

அனைத்து முக்கிய மாநிலங்களிலும் வேலைவாய்ப்பு சரிந்தாலும், அந்தச் சரிவு மாநிலங்களுக்கிடையே சீராக இல்லை. ஆந்திரப் பிரதேசம் (-1.9%), அசாம் (-7.7%), தெலங்கானா (-9.2%), தமிழ்நாடு (-17%) போன்ற ஒரு சில மாநிலங்களில் சரிவு குறைவாக இருந்தது. ஆனால் 19 முக்கிய மாநிலங்களில் 10 மாநிலங்களில் இந்தச் சரிவு 60% முதல் 85% வரை இருந்தது. ஏப்ரல்-ஜூலை 2026-ல் வேலைவாய்ப்பு உருவாக்கம் கிட்டத்தட்ட முடங்கிப்போன மாநிலங்களில் மத்தியப் பிரதேசம், உத்தரப் பிரதேசம், ஜார்க்கண்ட் போன்ற இந்தியாவின் மிகப்பெரிய, ஏழ்மையான மாநிலங்களும் அடங்கும்.

VB-G RAM G-க்கு மாறுவது வேலைவாய்ப்பு உருவாக்கத்தில் பெரும் உயர்வை ஏற்படுத்தும் என்று எதிர்பார்க்கப்பட்டதால், இந்தச் சரிவு மேலும் அதிர்ச்சியளிக்கிறது. 2026-27 யூனியன் பட்ஜெட்டில் விபி கிராம் ஜி திட்டத்திற்கான ஒதுக்கீடு ₹95,692 கோடியாகும். மாநிலங்களின் பங்களிப்பையும் (பெரும்பாலான மாநிலங்களுக்கு 40%) சேர்த்து, மொத்த பட்ஜெட் ₹1.5 லட்சம் கோடியாக அல்லது 2025-26 MGNREGA செலவினத்தை விட சுமார் 70% அதிகமாக உயர வாய்ப்பிருந்தது. ஊதியத்தில் பெரிய மாற்றங்கள் இல்லாத நிலையில், இந்த கூடுதல் பட்ஜெட் வேலைவாய்ப்பை அதிகரிக்கும் என்று எதிர்பார்க்கப்பட்டது. ஆனால் மாறாக, 2026-27-ன் முதல் நான்கு மாதங்கள் வரலாறு காணாத வீழ்ச்சியைக் கண்டுள்ளன.

நிச்சயமற்ற எதிர்காலம்

விபி கிராம் ஜி திட்டத்தைப் பற்றி இப்போதே முழுமையான தீர்ப்பை வழங்குவது முன்கூட்டிய முடிவாக அமையலாம். இருப்பினும், அதன் தொடக்கம் கண்டிப்பாக தோல்வியே ஆகும். இந்தியாவின் மிகப்பெரிய மற்றும் ஏழ்மையான மாநிலங்களில் பல மாதங்களாக வேலைவாய்ப்பு உருவாக்கம் முற்றிலும் முடங்கியுள்ளது என்பது மிகவும் கவலைக்குரிய விஷயம்.

அடுத்த சில மாதங்களில் நிலைமை மேம்படக்கூடும்; ஆனால் 2026-27-ல் திட்டமிடப்பட்ட ₹1.5 லட்சம் கோடி செலவினம் எவ்வாறு சாத்தியமாகும் என்பதைப் பார்ப்பது கடினமாக உள்ளது. பணியிடத்தில் முக அங்கீகாரக் கட்டாயம் மற்றும் மத்திய-மாநில அரசுகளின் நிதிப் பகிர்வு காரணமாக ஊதியப் பட்டுவாடாவில் கடுமையான சிக்கல்கள் ஏற்படலாம். மொத்தத்தில், எதிர்கால நிலைமை மங்கலாகவே காட்சியளிக்கிறது.

(19.08.2026 தி இந்து ஆங்கில நாளேட்டில் ழான் டிரேஸ், முகமது ஜமீர் எழுதியுள்ள கட்டுரையின் சுருக்கம் - மதி)